乌拉圭意大利演入波骚

大球王子

洲际国家盃季军战将由乌拉圭硬撼意大利，两军今届大踢进攻足球，场场精彩，「乌圭」射手科兰上仗极刑宴客，谷埋成肚火，撞正防线乱七八糟兼力疲心伤嘅意大利，仲唔趁机打落水狗咩？不过「蓝军」冇晒心理包袱，唔怕同你斗攻，势必合演入球骚，入球大有1.8倍值博。

（无綫翡翠台、明珠台及高清翡翠台周一凌晨零时直播）

科兰为挽面子必搏

乌拉圭前锋三叉戟科兰、卡云尼、苏亚雷斯一向犀利，三个今届已有进帐，不过科兰近期脚风唔多顺，准决赛对巴西开波冇耐博得12码，点知佢操刀却畀前国米队友施萨索拉斯救出，连后备前锋艾保靴南迪斯对大溪地之役都省4粒，作为乌拉圭领军人物，科兰惨成出局罪人，仲畀主帅泰巴尼斯暗寸冇料到，搞到呢位南非世盃金球奖得主乜嘢面都冇晒，满腔怒火下誓要搵意大利洩愤。事实上，「乌圭」今届4仗轰入12球，场场开大火力勐，有一班兄弟帮拖，科兰唔愁冇入波「餐士」。

意大利领队柏兰迪利主张进攻，但同时令脆弱嘅防线暴露人前，之前3场分组赛共失8粒，尤其係中坚邦路斯同基亚连尼均转身极慢，面对灵活快速嘅科兰及苏亚雷斯，非常蚀底。上仗「蓝军」对西班牙力保不失踢出代表作，但恶斗120分钟兼射埋12码惜败，体力消耗极大，未必回得切气，加上有中坚巴沙利受伤倦勤，防线更加立乱。

近届季军战旺大

既然今场冇乜竞争性，柏帅随时作出轮换，让基奥云高、迪亚文迪等攻击球员上阵，乌、意放开怀抱尽情进攻，相信入波唔会少，况且之前两届季军战均大手交易，与其估边队会赢，斯维认为捧大盘更加稳阵。

近两届季军战赛果

2009

西班牙和南非2:2

(加时西胜3:2)

2005

德国和墨西哥3:3

(加时墨胜4:3)